काठमाडौँ । नेपाली ललितकला क्षेत्रमा यसवर्ष पहिलो पटक सातै प्रदेशमा ‘प्रादेशिक ललितकला प्रदर्शनी २०८०’को थालनी भएको छ ।
मुलुकको सङ्घीयताअनुरुप सातै प्रदेशलाई समान स्थान दिँदै नेपाल ललितकला प्रज्ञा प्रतिष्ठानले यसपटकबाट सातै प्रदेशमा प्रदेशस्तरीय कला प्रदर्शनीको सुरुवात गरेको हो । कर्णाली प्रदेशको सुर्खेतबाट आज सुरु भएको उक्त प्रदर्शनी आगामी चैत १६ गतेसम्म चल्ने छ ।
कर्णालीको प्रदर्शनीमा ४६ कलाकारका ६६ कलाकृति समावेश गरिएका छन् । कर्णाली प्रदेशको प्रदर्शनी यही फागुन २१ गतेसम्म चल्नेछ । गण्डकीमा फागुन १९–२३ गतेसम्म, सुदूरपश्चिममा फागुन २०–२४ सम्म, लुम्बिनीमा फागुन २२–२६ सम्म, कोशीमा फागुन २९ देखि चैत ३ सम्म, मधेसमा चैत २ देखि चैत ५ सम्म तथा बागमतीमा चैत १२ देखि १६ गतेसम्म प्रदर्शनी गरिने छ । प्रदर्शनीबाट छानिएका कलाकृति २०८१ जेठ १५ गते काठमाडौँमा हुने ‘राष्ट्रिय ललितकला प्रदर्शनी’ मा राखिने छन् ।
