काठमाडौँ । नेपाल कम्युनिष्ट पार्टी (एमाले)का अध्यक्ष केपी शर्मा ओलीले देशलाई समृद्ध बनाउने अभिभारा युवाको रहेको बताउनुभयो ।
ललितपुर, च्यासलस्थित एमाले मुख्यालयमा राष्ट्रिय युवा सङ्घको तेस्रो पूर्ण बैठकलाई आज यहाँ सम्बोधन गर्दै उहाँले युवाले नै देशलाई समृद्ध, आधुनिक, न्यायोचित र शान्तिपूर्ण बनाउनुपर्ने बताउनुभयो ।
अध्यक्ष ओलीले अहिले समाजमा देखिएको असन्तुष्टिलाई सम्बोधन गर्न अराजक प्रवृत्तिविरुद्ध युवा लाग्नुपर्नेमा जोड दिनुभयो । उहाँले समाजमा अराजक फैलाउनेविरुद्ध अहिले समाजमा कोही पनि बोल्नेमान्छे नभएको बताउनुभयो । “हामीले हाम्रो समाज अराजक बनाउने खोजेको होइन । प्रजातान्त्रिक बनाउन खोजेको हो”, उहाँले भन्नुभयो, “हामी एउटा सभ्य, लोकतान्त्रिक, न्यायपूर्ण र समृद्ध समाज बनाउन चाहन्छौँ ।”
उहाँले युवामा सत्य र निष्ठाका साथ अथाडि बढ्न सक्ने क्षमता हुने भन्दै अनावश्यक सम्झौता नगर्न समेत आग्रह गर्नुभयो । उहाँले उद्यमशीलता युवाको विशेषता रहेको भन्दै अहिलेदेखि योजनाबद्ध ढङ्गले काम गर्नुपर्ने भनाइ राख्नुभयो ।
अध्यक्ष ओलीले एमालेले २०८४ सालको निर्वाचनमा अत्यधिक बहुमत ल्याउनुपर्ने भन्दै त्यसमा युवाको जिम्मेवारी ठूलो रहेको बताउनुभयो ।
सो पार्टी महासचिव शङ्कर पोखरेलले समाज र देश बदल्ने जिम्मा युवाको रहेको भन्दै राष्ट्र र पार्टीलाई केन्द्रविन्दुमा राखेर युवाले समाज र आर्थिक उन्नति गर्नुपर्ने सुझाव दिनुभयो । उहाँले युवाको आन्दोलनले विदेश गएका युवा पनि मुलुकमा नै केही गर्दछु भन्ने भावना पैदा गर्नुपर्ने धारणा राख्नुभयो ।
युवा सङ्घका प्रवक्ता निरज पौडेलले भोलिसम्म चल्ने बैठकमा प्रदेश, जिल्ला र पालिका अधिवेशन र समसामयिक विषयमा छलफल हुने बताउनुभयो ।
