काठमाडाैँ । नेपाली कांग्रेसका महामन्त्री गगन थापाले अहिलेसम्म चर्चामा आएका सबै काण्डहरु छानविनमा आउनुपर्ने बताउनु भएकाे छ । मंगलबार काठमाडौँमा आयोजित पार्टीको कार्यक्रमलाई सम्बोधन गर्दै उहाँले वाइडबडीदेखि ललिता निवाससम्मका काण्डहरु छानविन गर्नुपर्ने बताउनुभयाे । महामन्त्री थापाले, "जनतालाई आश्वस्त पार्नका लागि अख्तियारले नसकेको खण्डमा सर्वशक्तिशाली आयोग बनाएर भएपनि भ्रष्टाचारका काण्डहरु छानविन गर्नुपर्ने बताउनुभयाे ।"
‘जनताले सुनेका जतिपनि काण्डहरु छन्, त्यो चाहे वाइडबडी काण्ड होस्, चाहे त्यो ललिता निवास होस्, चाहे त्यो गिरीबन्धुको होस्, चाहे त्यो शिविरको होस्, जतिपनि छन्, लामो लिस्ट बन्छ । त्यो लिस्ट राख्ने, त्यो लिस्ट राखेर जनतालाई आश्वस्त पार्ने, यसभित्र भएको प्रत्येक काण्डको अख्तियारले गर्छ । ठीक छ, हामीलाई विश्वास छ । अख्तियारले गर्न सक्दैन, कुनै सर्वशक्तिशाली आयोग बनाउनुपर्छ, बनाऔं,’ महामन्त्री थापाले बताउनुभयाे ।
सर्वशक्तिशाली आयोग बनाइसकेपछि प्रधानमन्त्री, पूर्वप्रधानमन्त्री, मन्त्री, सांसद जोसुकै र जतिसुकै शक्तिशाली मान्छे दोषी देखिएपनि कारबाही गरिनुपर्ने उहाँको माग रहेकाे छ । महामन्त्री थापाले प्रधानमन्त्री, मन्त्री भएको मान्छे, वहालवाला वा भूतपूर्व जो भएपनि सार्वजनिक ओहदामा बसेकाहरुले गरेको भ्रष्टाचार नेपाली समाज र राज्यले छोड्दैन भन्ने मानक यही सरकारले स्थापित गर्नुपर्ने बताउनुभयाे ।
‘सार्वजनिक ओहदामा बसेर भ्रष्टाचार गरेका मान्छेहरुलाई नेपाली समाजले छाड्दैन । राज्यले छाड्दैन । भन्ने मानक हामीले स्थापित गर्न सक्यौं भने देश ठीक बाटोमा गयो भन्ने अवस्था बन्छ । हामीले त्यो बनाउने गरी काम गर्ने हो ,’ महामन्त्री थापाले बताउनुभयाे ।
